ഈ ശീലങ്ങള്‍ നിങ്ങളുടെ യുവത്വവും ആയുസ്സും വര്‍ദ്ധിപ്പിക്കും​

നല്ല ആയുസ്സും ആരോഗ്യവും സൗന്ദര്യവും നിങ്ങള്‍ക്ക് സ്വന്തമാക്കണമെങ്കില്‍ നിങ്ങള്‍ ജീവിതത്തില്‍ ചേര്‍ത്ത് പിടിക്കേണ്ട ചില ശീലങ്ങളുണ്ട്. അവ ഏതെല്ലാമെന്ന് നോക്കാം.
നല്ല യുവത്വവും ആരോഗ്യവും തുളുമ്പുന്ന ശരീരരവും നല്ല ആയുസ്സും ഉണ്ടെങ്കില്‍ മനുഷ്യന് നല്ല സന്തോഷത്തോടെ ജീവിക്കാന്‍ സാധിക്കും. ഒട്ടനവധി പണം ഉണ്ടായാലും പലര്‍ക്കും നേടിയെടുക്കാന്‍ സാധിക്കാത്ത സാധനങ്ങളാണ് ഇവ. ഇത്തരത്തില്‍ നല്ല ആരോഗ്യവും സന്തോഷവും ആയുസ്സും വര്‍ദ്ധിപ്പിക്കാന്‍ സഹായിക്കുന്നതും ആര്‍ക്കും ചെലവില്ലാതെ വീട്ടില്‍ തന്നെ ചെയ്യാന്‍ സാധിക്കുന്നതുമായ ചില ശീലങ്ങള്‍ ഇതാ...
വ്യായാമം​
വ്യായാമം ചെയ്യുന്നത് പലര്‍ക്കും ഇഷ്ടമില്ലാത്ത കാര്യമാണ്. എന്നാല്‍, കൃത്യമായി വ്യായാമം ചെയ്യുന്നത് നമ്മളുടെ ആരോഗ്യം നിലനിര്‍ത്തുന്നതിന് സഹായിക്കുന്നുണ്ട്. ആരോഗ്യത്തിന് മാത്രമല്ല, നല്ല ചര്‍മ്മം ഉണ്ടാകാനും യുവത്വം നിലനിര്‍ത്താനും വ്യായാമം നല്ലതാണ്.

സ്ഥിരമായി കുറഞ്ഞത് മുക്കാല്‍ മണിക്കൂര്‍ വ്യായാമം ചെയ്യുന്നവരാണെങ്കില്‍ അവര്‍ക്ക് പതി അസുഖങ്ങള്‍ കുറവായിരിക്കും എന്നാണ് പറയുന്നത്. അതിനാല്‍ തന്നെ, നല്ല ആരോഗ്യത്തോടേയും ചുറുചുറുക്കോടേയും നല്ല യുവത്വം തുളുമ്പുന്ന ചര്‍മ്മത്തോടെയും ജീവിക്കാന്‍ സാധിക്കും.
ഹെപ്പറ്റിറ്റീസ് വരാതിരിക്കാന്‍

ഡയറ്റ്​
നമ്മള്‍ എന്ത് കഴിക്കുന്നു? എന്ത് കഴിക്കാതിരിക്കുന്നു? എന്നത് വളരെ പ്രധാനപ്പെട്ടതാണ്. നമ്മള്‍ കഴിക്കുന്നതും വേണ്ട എന്ന് വെക്കുന്ന ആഹാരങ്ങള്‍കും അനുസരിച്ചാണ് നമ്മളുടെ ആരോഗ്യവും സൗന്ദര്യവും നിലനില്‍ക്കുന്നത്.

നമ്മള്‍ കഴിക്കുന്ന ആഹാരത്തില്‍ നിന്നും കാര്‍ബ്‌സ് കുറച്ച്, മധുരം കുറച്ച് പകരം, നല്ലപോലെ പഴം പച്ചക്കറികളും, പ്രോട്ടീനും അതുപോലെ, മറ്റ് ധാതുക്കളും പോഷകങ്ങളും അടങ്ങുന്ന ആഹാരങ്ങള്‍ ചേര്‍ത്താല്‍ നല്ല ആരോഗ്യവും അതുപോലെ തന്നെ നല്ല ചര്‍മ്മവും നിങ്ങള്‍ക്ക് സ്വന്തമാക്കാന്‍ സാധിക്കുന്നതാണ്.
​ഉറക്കം​
​ഉറക്കം ശരീരത്തിന്റെ ബാലന്‍സ് നിലനിര്‍ത്തുന്നതിന് ഒരു പ്രധാന ഘടകം തന്നെയാണ്. ഒരു ദിവസം കുറഞ്ഞത് 8 മണിക്കൂര്‍ നിങ്ങള്‍ക്ക് കൃത്യമായി ഉറക്കം ലഭിക്കുന്നുണ്ടെങ്കില്‍ നിങ്ങള്‍ ഭാഗ്യവാന്മാര്‍. നന്നായി ഉറങഅങുന്നത് അവയവങ്ങളുടെ കൃത്യമായ പ്രവര്‍ത്തനത്തിന് സഹായിക്കുന്നു.

ചര്‍മ്മത്തിന്റെ കാര്യം എടുത്താല്‍ ഉറക്കം ശരിയായില്ലെങ്കില്‍ ചര്‍മ്മത്തില്‍ വേഗത്തില്‍ ചുളിവുകളും അതുപോലെ തന്നെ കറുത്ത പാടുകളും വീഴാന്‍ സാധ്യത കൂടുതലാണ്. എന്നാല്‍, ഇതെല്ലാം ഇല്ലാതാക്കാന്‍ നല്ല ഉറക്കം നിങ്ങളെ സഹായിക്കും. അതുപോലെ, മാനസികാരോഗ്യം നിലനിര്‍ത്താനും നിങ്ങളുടെ ആയുസ്സ് വര്‍ദ്ധിപ്പിക്കാനും നല്ല ഉറക്കത്തിന് ശേഷിയുണ്ട്.
​മാനസിക പിരിമുറുക്കം​
അമിതമായിട്ടുള്ള ജോലി ഭാരം, അതുപോലെ, കുടുംബഭാരം എന്നിവയെല്ലാം ഒരാളുടെ ഉറക്കത്തെ കെടുത്തുന്നു. അവരുടെ മനസ്സമാധാനം നഷ്ടപ്പെടുത്തുന്നു. ടെന്‍ഷന്‍ ഉണ്ടാക്കുന്നു. എന്നാല്‍, ഇത്തരത്തില്‍ സ്ഥിരമായി മാനസിക പിരിമുറുക്കത്തിലൂടെ സഞ്ചരിക്കുന്ന ആളാണ് നിങ്ങള്‍ എങ്കില്‍ നിങ്ങളുടെ ആരോഗ്യവും പതിയെ നഷ്ടപ്പെടാന്‍ തുടങ്ങും.

നല്ല ആയുസ്സോടെ നല്ല ആരോഗ്യത്തോടെ കുറേ കാലം ജീവിക്കണമെങ്കില്‍ നിങ്ങളുടെ മാവസികാരോഗ്യം മെച്ചപ്പെടുത്താന്‍ ശ്രദ്ധിക്കേണ്ടത് അനിവാര്യമാണ്. ഇതിനായി നല്ല ഉറക്കം ഉറപ്പ് വരുത്തുക. അഥുപോലെ തന്നെ, ടെന്‍ഷന്‍ മറ്റുള്ളവരോട് ഷെയര്‍ ചെയ്യാന്‍ മറക്കരുത്. വേണമെങ്കില്‍ യോഗ പോലെയുള്ള കാര്യങ്ങള്‍ ശീലിക്കാം. എന്ത് ചെയ്തിട്ടും നിങ്ങള്‍ക്ക് ബാലന്‍സ് ചെയ്യാന്‍ സാധിക്കുന്നില്ലെങ്കില്‍ ഒരു ഡോക്ടറുടെ നിര്‍ദ്ദേശം തേടുന്നതും നല്ലതാണ്.
​സൗഹൃദങ്ങള്‍​
നല്ല സൗഹൃദങ്ങള്‍ സൂക്ഷിക്കുന്നത് നല്ലതാണ്. അതുപോലെ തന്നെ ബന്ധങ്ങളെ ദൃഢപ്പെടുത്താനും കുറച്ചതും കൂടെ സമൂഹത്തില്‍ ആക്ടീവായിരിക്കാനും സൗഹൃദങ്ങള്‍ നിങ്ങളെ സഹായിക്കും. ഇത്തരത്തില്‍ നല്ലപോലെ ആക്ടീവായിരിക്കുന്നത് നിങ്ങളുടെ ആരോഗ്യത്തിനും വളരെ നല്ലതാണ്.

കാരണം, ഇവ നിങ്ങളെ ഒറ്റപ്പെടലില്‍ നിന്നും സംരക്ഷിക്കുന്നു. ഒപ്പം ആളുകള്‍ ഉണ്ട് എന്ന തോന്നല്‍ ഉള്ളില്‍ ഉണ്ടാക്കുന്നു. അതുപോലെ, മറ്റുള്ളവരുടെ ജീവിതത്തില്‍ നിന്നും നല്ല പാഠങ്ങള്‍ പഠിക്കാന്‍ ഇത് നിങ്ങളെ സഹായിക്കും. ജീവിതത്തെ കുറിച്ച് നല്ലൊരു വീക്ഷണം ഉണ്ടാക്കാനും ഇത് സഹായിക്കുന്നുണ്ട്.
​ഹെല്‍ത്ത് ചെക്കപ്പ്​
നല്ല ആരോഗ്യത്തിന് കൃത്യമായ സമയക്രമത്തില്‍ ആരോഗ്യ പരിശോധനകള്‍ നടത്തേണ്ടത് അനിവാര്യമാണ്. എന്നാല്‍ മാത്രമാണ്, എന്തെല്ലാം കാര്യത്തില്‍ ഇനി ശ്രദ്ധിക്കണം. എന്തെല്ലാം ആരോഗ്യ പ്രശ്‌നങ്ങള്‍ ഉണ്ട് എന്നെല്ലാം നിങ്ങള്‍ക്ക് മനസ്സിലാക്കാന്‍ സാധിക്കൂ. ഇതും നിങ്ങളുടെ ആയുസ്സ് എത്രത്തോളം നീണ്ടു നില്‍ക്കുന്നു എന്ന് സ്വയം മനസ്സിലാക്കാന്‍ സഹായിക്കുന്നതാണ്.
​പുകവലി മദ്യപാനം​
നിങ്ങളുടെ ആയുസ്സ് വേഗത്തില്‍ കുറയ്ക്കുന്ന രണ്ട് സാധനങ്ങളാണ് പുകവലിയും മദ്യപാനവും. ഇത് ആരോഗ്യത്തെ മാത്രമല്ല, ചര്‍മ്മത്തേയും കാര്യമായി ബാധിക്കും. അതിനാല്‍ ഈ ശീലങ്ങള്‍ നിങ്ങള്‍ക്ക് ഉണ്ടെങ്കില്‍ അത് വേഗത്തില്‍ നിര്‍ത്തുന്നത് നല്ലതാണ്.

ഇന്ന് ചെറുപ്പക്കാരില്‍ വരെ പുകവലിയും മദ്യപാനവും അമിതമായി കാണപ്പെടുന്നു. ഇത് ഒരു അന്തസ്സായി കാണുന്നവരും കുറവല്ല. സത്യത്തില്‍ ഇത്തരത്തില്‍ ശീലങ്ങള്‍ വളര്‍ത്തുന്നത് നിങ്ങളുടെ ജീവനെ വരെ അപകടത്തില്‍ പെടുത്തുന്ന രോഗങ്ങളിലേയ്ക്ക് നയിക്കുന്നു.