- Tirur Road,Kuttippuram,Malappuram
- Phone: +917592997991
- hayathmedicare@gmail.com
വേനല്‍ച്ചൂട് കത്തിക്കയറുകയാണ്. ഇതിനൊപ്പം പലയിടത്തും ശുദ്ധജലക്ഷാമം സാധാരണാമായിരിയ്ക്കുന്നു. ഇതിനൊപ്പം
ജലജന്യരോഗങ്ങളും വര്‍ദ്ധിയ്ക്കുന്നു. ഇത്തരം രോഗങ്ങളില്‍ ഒന്നാണ് കോളറ. കോളറക്കേസുകള്‍ ബംഗളൂരുവിലെ
പിജികളിലും മറ്റും റിപ്പോര്‍ട്ട് ചെയ്യപ്പെട്ടിട്ടുണ്ട്. രാജ്യത്തെ പല സഥലങ്ങളിലും ശുദ്ധജലക്ഷാമം അനുഭവപ്പെടുന്നതിനാല്‍
കോളറ പോലുള്ള രോഗസാധ്യതയും വര്‍ദ്ധിയ്ക്കുന്നുണ്ട്. ഇതിനെതിരെ ശ്രദ്ധ വേണമെന്ന് അധികൃതര്‍ മുന്നറിയിപ്പ്
നല്‍കുകയും ചെയ്യുന്നു.
മലിനജലം
മലിനമായ ജലത്തിന്റെ ഉപയോഗത്തിലൂടെ വരുന്ന ഒന്നാണ് കോളറ. കുടിയ്ക്കുന്ന വെള്ളത്തിലൂടെ മാത്രമല്ല,
ഭക്ഷണമുണ്ടാക്കാന്‍ മലിനജലം ഉപയോഗിയ്ക്കുന്നതിലൂടെയും കോളറ വരുന്നു. വൈബ്രിയോ കോളേറെ എന്ന
ബാക്ടീരിയയാണ് ഈ രോഗമുണ്ടാക്കുന്നത്. ഇവയുല്‍പാദിപ്പിയ്ക്കുന്ന ടോക്‌സിന്‍ ചെറുകുടലിനെ ബാധിയ്ക്കുന്നതാണ്
രോഗകാരണം. ഇത് കുടല്‍ പ്രവര്‍ത്തനങ്ങളെ ബാധിയ്ക്കുന്നു. ഇതെത്തുടര്‍ന്ന് ആദ്യലക്ഷണങ്ങള്‍ പ്രത്യക്ഷപ്പെടുന്നു.
രോഗാണു ബാധിച്ചാല്‍
കോളറയുണ്ടാക്കുന്ന രോഗാണു ബാധിച്ചാല്‍ 12-28 വരെയുള്ള ഇന്‍ക്യുബേഷന്‍ കാലയളവിന് ശേഷം ലക്ഷണങ്ങള്‍
പ്രത്യക്ഷപ്പെടുന്നു. വയറിളക്കം, ഛര്‍ദി എന്നിവയാണ് പ്രധാന ലക്ഷണങ്ങള്‍. വയറിളക്കം മൂലം രോഗിയ്ക്ക് നിര്‍ജലീകണം
ഉണ്ടാകാന്‍ സാധ്യതയുണ്ട്. ഇതിനാല്‍ വേണ്ടത്ര വെളളം ശരീരത്തില്‍ എത്തിയില്ലെങ്കില്‍ രോഗം കാരണമുണ്ടാകുന്ന
സങ്കീര്‍ണതകള്‍ വര്‍ദ്ധിയ്ക്കാനും സാധ്യതയേറെയാണ്. ശരീരത്തില്‍ നിന്നും ജലാംശം നഷ്ടപ്പെടുന്നതിലൂടെ ലവണങ്ങളുടെ
കുറവുണ്ടാകുന്നതാണ് കാരണം. പേശിവലിവ്, രക്തസമ്മർദ്ദം കുറയുക, വേഗത്തിലുള്ള ഹൃദയമിടിപ്പ് എന്നിവ
നിർജ്ജലീകരണത്തിൻ്റെ സാധാരണ അനന്തരഫലങ്ങളാണ്. പെട്ടെന്നുള്ള ചികിത്സ കൂടാതെ, കടുത്ത നിർജ്ജലീകരണം
ഷോക്കിലേക്കും മരണത്തിലേക്കും നയിച്ചേക്കാം.
പാനീയങ്ങള്‍ കുടിയ്ക്കുന്നത്
നിര്‍ജലീകരണം തടയുകയെന്നത് തന്നെയാണ് പ്രധാനം. ഇതിന് ഒആര്‍എസ് പോലുള്ള പാനീയങ്ങള്‍ കുടിയ്ക്കുന്നത്
നല്ലതാണ്. ഓരോ തവണയും വയറിളകി പോയാല്‍ അതേയളവില്‍ തന്നെ ജലം ശരീരത്തിലെത്തിയ്ക്കാന്‍ ശ്രദ്ധിയ്ക്കണം.
കഴിവതും വേഗം ചികിത്സ തേടുകയും വേണം. ഗ്ലൂക്കോസ് ഡ്രിപ്പ് നല്‍കുന്നത് പോലുള്ള കാര്യങ്ങള്‍ ചെയ്യുന്നത് കോളറ
കാരണമുണ്ടാകുന്ന നിര്‍ജലീകരണം തടയാന്‍ ഏറെ അത്യാവശ്യമാണ്.
എങ്ങനെ പ്രതിരോധിക്കാം?
കോളറ വരാതെ തടയാന്‍ വേണ്ട അടിസ്ഥാനകാര്യമെന്നത് വൃത്തി തന്നെയാണ്. നാം കുടിയ്ക്കുന്ന ജലവും ഭക്ഷണം
പാകം ചെയ്യുന്നതിന് ഉപയോഗിയ്ക്കുന്ന ജലവും ശുദ്ധമായിരിയ്ക്കണം. തുറസായ സ്ഥലങ്ങളില്‍ മലമൂത്ര വിസര്‍ജനം
ചെയ്യാതിരിയ്ക്കുക. ഭക്ഷണവസ്തുക്കള്‍ നല്ലതുപോലെ വേവിച്ചും കഴുകിയും ഉപയോഗിയ്ക്കുക. വെളളം നല്ലതുപോലെ
തിളപ്പിച്ച് മാത്രം ഉപയോഗിയ്ക്കുക. കോളറ പെട്ടെന്ന് പടര്‍ന്നു പിടിയ്ക്കുന്ന രോഗമാണ്. ഇതിനാല്‍ രോഗിയുമായി
സമ്പര്‍ക്കമുള്ളവര്‍ ഏറെ ശ്രദ്ധിയ്ക്കണം. കൈകള്‍ നല്ലതുപോലെ കഴുകി വൃത്തിയാക്കുക. രോഗബാധിത പ്രദേശങ്ങൾ
സന്ദർശിക്കുന്നവർ തീർച്ചയായും രോഗപ്രതിരോധത്തിനായി വാക്സിനേഷൻ എടുക്കുക. രോഗം നേരത്തെ തിരിച്ചറിഞ്ഞാൽ
കൃത്യമായ വൈദ്യ സഹായം തേടുന്നത് ജീവൻ രക്ഷിക്കാൻ സഹായിക്കും.
