- Tirur Road,Kuttippuram,Malappuram
- Phone: +917592997991
- hayathmedicare@gmail.com
പനിയും പനി മരണങ്ങളും കേരളത്തില്‍ കൂടുകയാണ്. പ്രത്യേകിച്ചും ഡെങ്കിപ്പനി. പനി വന്നാല്‍ ഇത് ഗുരുതരമാകാതിരിയ്ക്കാന്‍ ചെയ്യേണ്ട ചില കാര്യങ്ങളെക്കുറിച്ചറിയൂ.
പനിച്ച് വിറയ്ക്കുകയാണ് കേരളം. പനി മരണങ്ങളും കൂടുന്നു. പല തരത്തിലെ പനികളാണ് എങ്ങും. സാധാരണ പനി വന്നാല്‍ രണ്ടുമൂന്നു ദിവസം കഴിഞ്ഞാല്‍ മാറും. ഇതല്ലെങ്കില്‍ മരുന്നു കഴിച്ചാല്‍ രണ്ട് ദിവസം കൊണ്ട് ഭേദമാകും. എന്നാല്‍ ഇപ്പോഴത്തെ പനി അങ്ങനെയല്ല, നാലു ദിവസങ്ങളില്‍ കൂടുതലായുള്ള പനി. തലവേദന, ക്ഷീണം. പനി മാറിയാലും ക്ഷീണം ഒരു മാസത്തോളം നീണ്ടു നില്‍ക്കുന്നു.
പനി പടരുന്നതിന്
പനി പടരുന്നതിന് കാരണങ്ങളുണ്ട്. കടുത്ത ചൂടായിരുന്നു ഇക്കുറി. ഇത് പെട്ടെന്ന് തണുപ്പിലേയ്ക്ക് മാറി. ഇത് വൈറസിന് അനുകൂല സാഹചര്യമാണ്. ഇതു മാത്രമല്ല, ഡെങ്കിപ്പനിയ്ക്ക് കാരണമായ കൊതുകുകള്‍ കെട്ടി നില്‍ക്കുന്ന ജലത്തില്‍ പെറ്റു പെരുകുന്നു. മാങ്ങ, ചക്കക്കാലമായിരുന്നു. ഇപ്പോഴും ചിലയിടത്തുണ്ട്. ഇവയില്‍ ധാരാളം ഈച്ചകള്‍ വരുന്നു. ഇവയും ഛര്‍ദി പോലുള്ള പല പ്രശ്‌നങ്ങളും വരുന്നു. കുട്ടികള്‍ സ്‌കൂളില്‍ പോയിത്തുടങ്ങിയതോടെ പനി പടര്‍ന്ന് പിടിയ്ക്കുന്നു. ഇത് എച്ച് വണ്‍ എന്‍ വണ്‍ പനിയാണ്. ഇന്‍ഫ്‌ളുവന്‍സ എന്നു പറയാം. കുട്ടികളില്‍ പൊതുവേ പടരുന്ന പനി ഇത്തരത്തിലുള്ളതാണ്.
പനിയോട് അനുബന്ധിച്ച്
അലര്‍ജി പ്രശ്‌നങ്ങളുളളവരെങ്കില്‍ പനിയോട് അനുബന്ധിച്ച് സൈനസ് പ്രശ്‌നങ്ങള്‍, തൊണ്ടവേദന പോലുളള പല പ്രശ്‌നങ്ങളുമുണ്ടാകുന്നു. ഇതിനൊപ്പം കൊറോണയുമുണ്ട്. ഇത് അത്ര ഗുരുതരമല്ലാത്തത് കൊണ്ട് ആരും ഇപ്പോള്‍ ഇത് കാര്യമായി ടെസ്റ്റ് ചെയ്യാറില്ല. ഇതിനാല്‍ തന്നെ കൊറോണയെന്ന് തിരിച്ചറിയുന്നുമില്ല. ഇത്തരം പനികളുടെ കൂട്ടത്തില്‍ കൊറോണ വൈറസ് പടര്‍ത്തുന്ന പനിയും മറ്റുമുണ്ട്. ഇതിനേക്കാളെല്ലാം ശക്തിയായി ഇന്നത്തെ കാലത്ത് വരുന്ന ഗുരുതരമായ പനി ഡെങ്കിപ്പനിയാണ്. ഈഡിസ് എന്നറിയപ്പെടുന്ന ചെറിയ, കുത്തുകളോടു കൂടിയ കൊതുകാണ് ഇതു പരത്തുന്നത്.
ഡെങ്കി
ഇവ കടിച്ചാല്‍ വല്ലാത്ത ചൊറിച്ചിലായിരിയ്ക്കും. ഇവ കടിച്ചാല്‍ ഏഴ് ദിവസത്തിനുള്ളില്‍ പനി വരുന്നു. 100ല്‍ കൂടുതല്‍ വരുന്ന ഈ പനിയ്‌ക്കൊപ്പം ശരീരവേദന, ക്ഷീണം പോലുള്ളവയുമുണ്ടാകും. ഇത്തരം പനി മാറാതിരിയ്ക്കുമ്പോള്‍ പലരും ഡോക്ടറെ കാണാതെ ആന്റി ബയോട്ടിക്‌സ് വരെ വാങ്ങിക്കഴിയ്ക്കും. വാസ്തവത്തില്‍ ഡെങ്കിപ്പനിയ്ക്ക് ആന്റി ബയോട്ടിക്കുകള്‍ തീരെ ഫലപ്രദമല്ല. ഡെങ്കിപ്പനി വന്നാല്‍ ശരീരത്തിലെ പ്ലേറ്റ്ലെറ്റ് കൗണ്ട് കുറയുന്നുവെന്നതാണ് ഇത് ഗുരുതരമാകുന്നത്.
വെള്ളം
ഡെങ്കിപ്പനി രക്തപരിശോധനയിലൂടെ കണ്ടെത്താം. ഈ പനിയെങ്കില്‍ ധാരാളം വെള്ളം കുടിയ്ക്കണം. ഒരുമിച്ച് വെള്ളം കുടിയ്ക്കുന്നതിന് പകരം അര മണിക്കൂര്‍ ഇട വിട്ട് കുടിയ്ക്കാം. പ്രമേഹമില്ലെങ്കില്‍ വെള്ളത്തില്‍ അല്‍പം ഉപ്പും ഗ്ലൂക്കോസും ചേര്‍ത്തിളക്കി കുടിയ്ക്കാം. ഓറഞ്ച് ജ്യൂസ് പോലുളളവ കുടിയ്ക്കാം. ഇതെല്ലാം ക്ഷീണമകറ്റും. പെട്ടെന്ന് ദഹിയ്ക്കുന്ന പ്രോട്ടീനുകള്‍ കഴിയ്ക്കാം. ഇത് ഏറെ ഗുണകരമാണ്. പയര്‍ വര്‍ഗങ്ങള്‍ കഴിയ്ക്കാം. മുട്ടയും മീനും ചിക്കനുമെല്ലാം കഴിയ്ക്കാം. റെഡ് മീറ്റ് കഴിവതും ഒഴിവാക്കാവുന്നതാണ്.
ഫ്രൂട്‌സ്
കഞ്ഞിയും കഞ്ഞിവെള്ളത്തില്‍ അല്‍പം ഉപ്പിട്ട് കഴിയ്ക്കുന്നതുമെല്ലാം ഏറെ നല്ലതാണ്. പ്ലേറ്റ്ലെറ്റ് കൗണ്ട് കൃത്യമായി പരിശോധിയ്ക്കണം. ഇത് കുറഞ്ഞാല്‍ മധുരം ചേര്‍ക്കാതെ ഫ്രൂട്‌സ് കഴിയ്ക്കാം. പോംഗ്രനേറ്റ്, സ്‌ട്രോബെറി, പപ്പായ, തണ്ണിമത്തന്‍ എന്നിവയെല്ലാം നല്ലതാണ്. പപ്പായ ഇലയുടെ ജ്യൂസ് കുടിക്കുന്നത് പ്ലേറ്റ്ലെറ്റ് കൗണ്ട് കൂടാന്‍ സഹായിക്കുന്നു.
പ്ലേറ്റ്ലെറ്റ് 25000ല്‍ താഴെയായാല്‍ മെഡിക്കല്‍ സഹായം തേടുക. ഡെങ്കി വന്നു പോയാല്‍ പിന്നെ ക്ഷീണമുണ്ടാകാം. മുടി കൊഴിച്ചിലും ചര്‍മ പ്രശ്‌നങ്ങളുമെല്ലാമുണ്ടാകാം. ഇതൊഴിവാക്കാന്‍ അല്‍പദിവസങ്ങളെങ്കിലും വിശ്രമമെടുത്ത ശേഷം ജോലിയ്ക്കും മറ്റും പോകുക. ക്ഷീണം കുറഞ്ഞെന്ന് കരുതി രണ്ടുമൂന്നു ദിവസം കഴിഞ്ഞ് സാധാരണ രീതിയിലേയ്ക്ക് മാറരുതെന്നര്‍ത്ഥം.
